Program JTDL & My Rakyat Dipenyadi Dikena Nyaup Nyual Asil Betanam Betupi

HARI EMPAT, 28 OKTOBER 2021

KUCHING: Sapit Kepala Menteri Datuk Amar Douglas Uggah Embas udah bejadika Program Jualan Terus Dari Ladang (JTDL) enggau My Rakyat di Canaan Square di Kuching, kena Hari Empat.

Iya ke mega Menteri Betanam Betupi Moden, Tanah Adat enggau Pemansang Kandang Menua Sarawak madah, program nya nyadika pelasar dikena nyaup orang betanam betupi nyual asil sida nengah Opis Nyual Asil Tanam Menua (FAMA) ti disaup Gerempung Peladang Nengeri Sarawak (PPNS).

“Program tu sebagi ari pengara perintah nengeri nyaup orang bekebun ngelempungka penanggul sida nyual asil tanam ketegal pandemik COVID-19,” pia ku iya madah.

Nambahka jaku iya, Datuk Amar Douglas madah, Kepala Menteri Sarawak, Datuk Patinggi Dr. Abang Abdul Rahman Zohari Tun Datuk Abang Openg udah ngemendarka agih belanja RM10 juta dikena nyaup PPNS ngemanahka sistem bejual ke moden agi kelimpah ngerembaika produk ke dieksport.

“Ari nya, kitai nengah FAMA nyaup PPNS nempa pengawa nyual ukai aja di Sarawak enggau Malaysia tang mega ngagai menua bukai,” ku iya madah.

Nangkan ke nya, Tuai Direktor FAMA, Dato’ Zainal Abidin Yang Razalli madah, program JTDL enggau My Rakyat ngemeranka konsep nyadi pelasar orang betanam betupi enggau berikan sereta orang bebeli barang ti netapka rega pemadu murah ti bela nyadika chara nyungkakka penatai menua.

Ku iya, FAMA udah bisi langgur ngemujurka program ke sebaka ba selampur malaysia ngambika ulih meri awak ngagai orang betanam betupi nengah tamu, pasar bejual asil betanam nyengkaum agro bazaar kedai rayat.-EDISI UKAS