HARI SATU, 8 NOVEMBER 2021

SARIKEI: Menteri Muda Pengatur Mengeri, Tanah enggau Rampa Menua Sarawak, Datu Len Talif Salleh udah nyuaka pemeri RM10,000 ngagai Gerempung Main Bol Sitak Sarikei enggau Kelab Referee Main Bol enggau Futsal Sitak Sarikei di Sri Nyelong, kena Hari Minggu.

Chek pemeri nya disuaka ngagai Presiden Gerempung Main Bol Sitak Sarikei, Abang Zaini Abang Ismail enggau Chairman Kelab Referee Main Bol enggau Futsal Sitak Sarikei, Hamzah Mohamad Endai ti bela nerima chek RM5,000.

Tuju pemeri nya dikena nyaup nyungkakka tikas main bol di sitak Sarikei nyengkaum ngangkatka pemanah pengelandik raban nembiak.

Kelimpah ari nya, pemeri dikeandal ulih nyaup gerempung ke ngambi bagi ba Pekit Liga Main Bol SSC/FAS Baruh 25 Taun, Opis Menteri Raban Nembiak enggau Main Renggat Nengeri Sarawak ti benung diatur ari 6 November nyentuk 20 November 2021.

Abang Zaini nangkan ke nya madahka Datu Len udah mayuh nyaup gerempung sida ngatur program bekaul main bol enggau futsal.

Sida bela ngenataika jaku terima kasih ngagai Datu Len ke udah nyediaka perengkaguna lumba ke chukup manah lebih agi baka Komplek Sukan Intergrasi, Kampung Seberang Sarikei enggau gelanggang futsal sereta ke bukai. -EDISI UKAS