HARI DUA, 16 NOVEMBER 2021

MIRI: Projek ngaga Miri Sentral ti nyengkaum ngaga terminal bas dipelabaka tembu Januari 2024.

Projek ke beungkus RM23.22 juta nya deka berengkah digaga Disember ke deka datai dalam kandang 26 bulan.

Penembu renggat keterubah projek deka nyadi hab jalai baru di mengeri Miri.

Terminal bas baru nya deka digagaka 21 palan penyangkai bas, 12 kaunter tikit, 15 palan teksi, 10 iti kedai, tiga iti endur paking kerita ‘disable’, palan nyimpan barang enggau palan endur nganti sereta ke bukai.

• 

Renggat kedua projek nyengkaum ngaga supermakit dua ringkat lalu renggat ketiga ngaga kompleks komersial tiga ringkat.

Kepala Menteri Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg udah dipebasa bejadika pengerami nasih tanah projek nya kena Hari Satu tu tadi.

Sama bela datai maya nya Menteri Perintah Menua enggau pengawa Berumah, Dato’ Sri Prof. Dr. Sim Kui Hian, Menteri Perengka Pengangkut Sarawak, Dato’ Sri Lee Kim Shin, Menteri Muda Dagang Temuai, Seni enggau Main Asal Sarawak, Datuk Sebastian Ting Chiew Yew, Sapit Speaker DUN Sarawak, Dato Gerawat Gala, Sapit Sekretari Perintah Nengeri (Transformasyen Sosio Ekonomi), Dato Sri’ Mohamad Abu Bakar Marzuki enggau bala temuai dipebasa ke bukai. -EDISI UKAS