Penumbuh SIDC Pelasar Pemansang Industri Biopengawa Berubat Sarawak

HARI TIGA, 17 NOVEMBER 2021

KOTA SAMARAHAN: Penumbuh Palan Mansik Penyakit Berampit (SIDC) deka nyadi pelasar pemansang industri biopengawa berubat di Sarawak.

Kepala Menteri Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, tu deka ngepunka bio hab ti ngempung sepital, palan mansik, pelajar enggau palan bio.

Ku iya, SIDC mega ditumbuhka nyerumba pengawa perintah ngemansangka industri biopengawa berubat nengah Strategi Pemansang Udah COVID-19 (PCDS 2030).

“SIDC ditumbuh bela tau ngelengkaska agi pemansang ekonomi enggau modal mensia ba biopengawa berubat di Sarawak.

“Projek tu engkeman digaga maya tu laban kitai mesti berengkah ngemansangka diri ba pengelandik dikena napi nama-nama penyakit dudi hari,” pia ku iya madah.

Iya bejaku munyi nya ba Pengerami Nasih Tanah Palan Mansik Penyakit Berampit (SIDC) di Kota Samarahan, kemari.

Kepala Menteri maya nya mega madah, pengerami ke diatur nya nyadika kelai baru ngagai pengeransing Perintah Sarawak nyungkakka tikas pemanah pengawa berubat enggau pengelantang rayat Sarawak.

Dulu ari nya, ba jaku iya, Menteri Pelajar, Sains Enggau Pansik Teknologi Sarawak, Datuk Amar Micheal Manyin Jawong madah, SIDC nya dipelabaka berengkah dikena ba taun 2024.

Ku iya, palan nya deka ngempung pengelandik ari menua tu enggau entarabansa kelimpah matak kompeni biopengawa berubat dunya ti deka nentuka Sarawak semampai nyikap diri napi nama-nama ke nyadi dudi hari ila.

“Tuju penumbuh palan tu deka nyungkakka pemanah pengawa mansik penyakit berampit, nyikap Sarawak enggau penau sereta perengkaguna dikena nguji ubat, vaksin enggau kereban sereta nentuka Sarawak ulih nyidi, mansik sereta melabaka penau penyakit berampit.

“Tu bela ngenegapka sereta nempa kerejasama enggau Opis Menteri Pengerai Malaysia (KKM) ba pengawa napi penyakit berampit di Sarawak,” ku iya madah.

Bela datai, Menteri Perintah Menua enggau Pengawa Berumah Sarawak, Dato’ Sri Dr Sim Kui Hian, Menteri Muda Pelajar enggau Pansik Teknologi Dr Annuar Rapaee enggau Sekretari Perintah Nengeri Sarawak, Datuk Amar Jaul Samion. -EDISI UKAS