HARI DUA, 23 NOVEMBER 2021

BEKENU: FELCRA Berhad merambu deka ngaga kilang sum sawit di Sarawak dikena ngurangka rega sum ti belipat rega ba nengeri tu.

Sapit Menteri Pemansang Menua Pesisir Datuk Hasbi Habibollah madah, perambu nya agi benung dirandau enggau sida ke bekaul ari nengeri tu empu.

Ku iya, enti udah bisi kilang sum sawit, dia rega sawit mega deka kurang lalu ngurangka puku nanam sawit.

“Aku nyukung perambu tu. Kebendar iya rega sawit enda mar tang ketegal ungkus perengka pengangkut, rega iya nyau belipat di Sarawak.

“Pekara tu udah dirandau dikena kitai nentuka rega sum nya engkeman rega dijual ditu,” pia ku iya ba aum media udah bejadika Pengerami Selamat Penyereta FELCRA Berhad Miri ba pasar Bekenu, empai lama tu tadi.

Dulu ari nya, ba jaku iya, Datuk Hasbi madahka FELCRA Berhad udah nanam sawit ba 47,731 hektar pemesai tanah ti dikereja 20,307 iku penyereta ari serata Sarawak nyengkaum penyereta Ladang Rakyat enggau Ladang Sejahtera.

Ba taun 2020, penyereta kebun sawit nya nerima RM13 juta untung.

Ba pengerami nya, pemeri Prihatin Keluarga FELCRA disuaka ngagai 100 iku indai tunggal, orang tuai, pemeri RISDA Prihatin Pekebun Kecil Makmur ngagai 50 iku penerima enggau Bantu Kereban Sekula ngagai 100 iku nembiak ari Bekenu.

Sama bela datai, Menteri Muda Orang Indu, Ruang Bilik enggau Pemansang Nembiak Mit Datuk Rosey Yunus enggau Kaban Parlimen Sibuti, Lukanisman Awang Sauni. -EDISI UKAS