HARI SATU, 29 NOVEMBER 2021
NIAH: Perintah Gabungan Parti Sarawak (GPS) ti mentas enda kala leju mai pemansang ungkup pengelantang rayat di nengeri tu.
Kepala Menteri Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, ba Bajet Sarawak 2022, lebih RM10 bilion udah diungkupka dikena ngaduka pemansang lebih agi di menua pesisir.
Ku iya, pelilih mit subis bela enda tinggal ngasaika macham bengkah pemansang nyengkaum projek rayat, ai, karan enggau jalai alun.
“Nya alai, kitai enda kala leju meri agih belanja ke mayuh dikena ngaduka pemansang menua pesisir lebih agi baka ai enggau karan ngagai rayat,” pia ku iya madah.
Iya bejaku munyi nya maya Pengerami Bejadika Waterfront Niah Renggat 2 di Dewan Tebuka Sepupok Niah, kena Hari Satu.
Projek nya digaga nengah RTP Khas taun 2015 enggau ungkus RM2 juta.
Bela datai maya pengerami nya, Menteri Muda Orang Indu Enggau Pemansang Nembiak Mit Sarawak, Datuk Rosey Yunus, Menteri Muda Ba Opis Kepala Menteri (Pekara Islam & DBKU) ke mega Menteri Muda Ai, Datuk Dr Abdul Rahman Junaidi, Kaban Parlimen P.218 Sibuti, Lukanisman Awang Sauni, Sapit Sekretari Perintah Nengeri Sarawak (Transformasyen Sosio Ekonomi), Dato’ Sri Mohamad Abu Bakar Marzuki sereta bala temuai ke dipebasa ke bukai.
Ba pengerami nya, Kepala Menteri mega madah Perintah Sarawak semampai ngamatka semaya ngagai rayat.
Ku iya, Perintah GPS ngembuan pelin ke silik dikena ngamatka semaya ngagai rayat bepelasarka penemu politik, rama, ekonomi sereta ari mayuh sukut pengidup rayat ke bukai.
“Kitai mega deka majak chakah ngeringka hak Sarawak lalu ngambi pulai hak ke lenyau ba Sempekat Malaysia 1963 (MA63),” ku iya madah baru.
Nangkan program nya, Kepala Menteri bela bisi ngabas Projek Jematan Bekenu, Taba Projek Masjid Baru Bakam, Miri enggau Masjid Baru Taman Tunku.-EDISI UKAS
