HARI SATU, 29 NOVEMBER 2021
KUCHING: Gabungan Parti Sarawak (GPS) andal ulih menang ba semua 82 iti penuduk Kunsil Nengeri (DUN) Sarawak maya Pengawa Bepilih Besai Nengeri (PRN) Ke-12 ti deka diatur kena 18 Disember tu.
Kepala Menteri Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pekara nya ulih nyadi nyata nyema semua parti komponen besaup baka siti tim.
“Enti kitai ‘belaban’ bepegai enggau ulah besaup ba siti tim, kitai ulih menang ba semua 82 iti penduduk DUN,” pia ku iya maya Pengerami Bejadika Injin GPS Nyerumba PRN Sarawak di Kuching, kena Hari Minggu tu tadi.
Iya ke mega Chairman GPS madahka rayat Sarawak deka ngasaika pemansang ke meruan agi kelimpah pengelantang rama ke bukai nyentuk taun 2030 bepelasarka Pelin Pemansang Udah COVID-19 2030 ke udah dilangkar perintah GPS, lalu nya ulih dipenyadi nyema rayat meri sukung.
Berebak enggau nya, Kepala Menteri sekali agi beterima kasih ngagai Parti Pribumi Bersatu (BERSATU) enggau Barisan Nasional (BN) ti udah ngaga pemutus enda bediri ba PRN Sarawak ke deka datai.
“Aku nemu sida udah nemu baka ni gaya politik di Sarawak. Sida nemu politik di Sarawak enda sebaka di Semenanjung,” ku iya madah baru. -EDISI UKAS
