Pengawa Nanam ‘Cash Crop’ Deka Nyungkak Sosio Ekonomi Peranak DUN Layar

HARI DUA, 30 NOVEMBER 2021

BETONG: Pengawa nanam ‘Cash Crop’ nengah chara fertigasi tauka hidroponik deka nyungkakka penatai pemisi peranak ba sitak Kunsil Nengeri (DUN) Layar.

Pekara nya dipadahka Ex-Kaban Kunsil Nengeri Sarawak (ADUN) Layar, Dato Gerald Rentap Jabu maya ba pengawa nyuaka Bantu Sum Sawit Enggau Lada (BBKSL) beserimbai pengawa bejadika Agriculture Community Outreach Programme (AgriCOP) Renggat Ke 26 di Rumah Johnson Iba, Skatap Layar Betong, kena Hari Minggu.

Kelimpah ari nya, projek ngaga jalai baru Skatap, Meribong, Nanga Jelau, Batu Lintang enggau Jelau Atas benung digaga ba renggat kepenudi dikena ngemuntangka jalai peranak rumah panjai ba dia.

Dato Gerald nambahka jaku iya, pengawa betanam sayur enggau nupi ikan keli ba sitak nya engkeman digaga kelimpah ari pengawa nanam getah enggau sawit dikena nyungkakka penatai pemisi ngagai lebih 20,000 iku peranak Betong.

Residen Sitak Betong, Richard Michael Abunawas ti ngarika Sapit Kepala Menteri, Datuk Amar Douglas Uggah Embas ngarapka pekebun semampai betanya enggau Opis Betanam Betupi ba pekara bekaul enggau bantu ari perintah.

Bela datai iya nya Sapit Direktor Opis Betanam Betupi Nengeri Sarawak, Ngab Dollah Salam, Pegawai Opis Betanam Betupi Sitak Betong, Petrus Kang enggau Tuai Rumah Skatap, Johnson Iba. –EDISI UKAS

add comment