Palan Penerebai Bilun Bebuling Ngamatka Semaya Ngagai Rayat Di Betong

HARI TIGA, 1 DISEMBER 2021

BETONG: Pemutus ngaga projek Palan Penerebai Bilun Bebuling Spaoh mandangka Perintah Sarawak endang sigi ngamatka semaya.

Sapit Kepala Menteri, Datuk Amar Douglas Uggah Embas madah, projek tu ila deka mai pemaik ngagai rayat lebih agi ba pengawa nyungkakka asil tanam enggau industri dagang temuai kelimpah muka runding raban penyakal ti seruran ngemansutka jaku petenah.

“Tu nyengala mandangka Kepala Menteri bebendar ngamatka semaya ngaga palan penerebai di Spaoh taja dikemaruhka raban penyakal.

“Projek tu ukai semina mai penguntung ke besai ngagai Spaoh tang mega genturung pendiau ari Mukah nyentuk ke Betong kelimpah Projek Bukit Sadok enggau SADA ti bela ngasaika pemaik,” ku iya bejaku ba Pengerami Nasih Tanah Palan Penerebai Bilun Bebuling spaoh, kena Hari Dua.

Datuk Amar Douglas nambahka jaku iya, rayat ulih meda kediri empu Kepala Menteri ngamatka semaya iya maya madahka deka ngaga palan penerebai bilun di Spaoh.

“Kitai ulih meda semaya udah dikeamatka maya Palan Penerebai Bilun Bebuling berengkah digaga taja tejanggal ketegal pandemik COVID-19.

“Kepala Menteri endang udah beratika Spaoh ba pekara bekaul enggau ‘food basket’ lalu Batang Ai ba pengawa dagang temuai.

Bela datai, Kepala Menteri, Datuk Patinggi Tan Sri (Dr) Abang Abdul Rahman Zohari Tun Datuk Abang Openg, Menteri Muda Perengka Pengangkut Sarawak, Datuk Jerip Susil, Kaban Parlimen, Datuk Robert Lawson Chuat, ex-ADUN Saribas, Mohamad Razi Sitam, ADUN Layar Dato Gerald Rentap Jabu, Sapit Sekretari Perintah Nengeri Sarawak (Transformasyen Sosioekonomi), Dato Sri Mohamad Abu Bakar Marzuki enggau Residen Sitak Betong Richard Michael Abunawas.-EDISI UKAS

add comment