HARI TIGA, 1 DISEMBER 2021
BETONG: Projek ngaga Palan Penerebai Bilun Spaoh siti ari projek strategik ti nyadika pemansang ba sitak Betong.
Kepala Menteri Sarawak, Datuk Patinggi Tan Sri (Dr) Abang Zohari Tun Datuk Abang Openg madah, sitak nya ngembuan dua bengkah pengawa ke besai iya nya ba pengawa betanam betupi enggau dagang temuai.
“Keterubah iya nya pengawa betanam ti dikumbai ‘food basket’ ba sitak tu tau nyadi palan ngasilka barang pemakai.
“Kelimpah ari nya, pengawa betupi mega tau dikemansangka baka SALCRA nengah pengawa nupi chapi enggau kambin.
“Iya ti kedua iya nya pengawa dagang temuai ti besemak enggau Batang Ai alai nyema penemuai ngelawa Batang Ai ari Kuching nengah bilun semina sejam aja,” ku iya bejaku ba aum media udah bejadika Pengerami Nasih Tanah Palan Penerebai Bilun Bebuling Spaoh, kena Hari Dua.
Kepala Menteri madahka Palan Penerebai Bilun Bebuling, Spaoh ke beungkus RM108.1 juta dipelabaka tembu bulan September 2023.
Iya madah, Sarawak agi bisi mayuh endur dikena ngaduka pengawa betanam betupi nengah teknologi IOT kelimpah dikerembaika dikena nyungkak penatai pemisi nengeri.
“Tu sebagi ari perambu kitai nyerumba Malaysia ti randaka industri barang pemakai ke engkeman.
“Sarawak mega agi bisi mayuh endur dikena ngaga pengawa betanam betupi alai diatu kitai ngemeranka teknologi baka IOT,” ku iya.
Bela datai iya nya Sapit Kepala Menteri, Datuk Amar Douglas Uggah Embas, Menteri Muda Perengka Pengangkut Sarawak, Datuk Jerip Susil, Kaban Parlimen
Bela datai, Sapit Kepala Menteri Datuk Amar Douglas Uggah Embas, Menteri Muda Perengka Pengangkut Datuk Jerip Susil, Kaban Parlimen Datuk Robert Lawson Chuat, ex-Kaban Kunsil Nengeri (ADUN) Saribas Mohamad Razi Sitam, ex-ADUN Layar Dato Gerald Rentap Jabu enggau Sapit Sekretari Perintah Sarawak (Transformasyen Sosioekonomi) Dato Sri Mohamad Abu Bakar Marzuki, Residen Sitak Betong, Richard Michael Abunawas sereta bala bukai.-EDISI UKAS
