HARI TIGA, 8 DISEMBER 2021
KUCHING: Beserimbai enggau pengerami nyambut penumbuh ke-60 taun Suruhanjaya Perkhidmatan Awam Sarawak (SPANS), Perintah Nengeri udah besetuju ngagihka belanja dikena ngaga Opis Baru SPANS ba Bangunan Hikmah Exchange ti dipelabaka tembu suku ketiga taun siti agi.
Kepala Menteri Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg mantaika pekara nya maya pengerami nya di Dewan Undangan Negeri, Petra Jaya ditu, kena Hari Tiga.
“Beserimbai enggau pengerami tu, aku enggau gaga ati madahka Perintah Nengeri udah besetuju meri agih dikena ngaga Opis Baru SPANS ba Ringkat 16 enggau 17, Bangunan Hikmah Exchange lalu dipelabaka tembu suku ketiga taun siti agi,” pia ku iya madah.
Kepala Menteri mega madah, pengereja pengawa perintah nyadi batang pemujur Perintah Nengeri.
Nya alai, iya ngarapka pengereja pengawa perintah ba nengeri tu ulih nyadi siti tim ke nyaup ngamatka juluk ati Sarawak nyadi nengeri ekonomi digital sereta mansang manggai taun 2030.
“Aku andal amat pengereja pengawa perintah nengeri tu ulih nyadi tim ti tau bejadika juluk ati deka ngubah Sarawak nyadi siti ekonomi digital lalu bepenatai pemisi besai ba taun 2030,” ku iya madah baru.
Ba pengerami nya, Kepala Menteri bela dipebasa bejadika dua iti bup ke ditengkebang SPANS iya nya ‘Buku Menjunjung Amanah dan Tanggungjawab’ enggau ‘Buku Coffee Table’.
Sama bela datai, Menteri ba Opis Kepala Menteri (Integriti enggau Ombudsman), Datuk Talib Zulpilip, Sekretari Perintah Nengeri Sarawak, Datuk Amar Jaul Samion, Sapit Sekretari Perintah Nengeri Sarawak (Transformasyen Menua Pesisir) Datu Ik Pahon Joyik, Sapit Sekretari Perintah Nengeri Sarawak (Transformasyen Pemanah Gawa enggau Servis), Datu Dr. Sabariah Putit enggau Chairman Suruhanjaya Perkhidmatan Awam Negeri Sarawak Datu Abdul Ghafur Shariff sereta temuai ke dipebasa ke bukai. -EDISI UKAS
