HARI TIGA, 8 DISEMBER 2021

KATIBAS: Rayat ba sitak Kunsil Nengeri (DUN) Katibas dipinta meri sukung sida ngagai chalun Gabungan Parti Sarawak (GPS), Lidam Assan.

Menteri Dagang Dalam Nengeri enggau Pekara Bebeli Barang Dato’ Sri Alexander Nanta Linggi madah, sukung rayat ari pengawa ngundi GPS deka nentuka pemansang ba DUN Katibas semampai betandu.

“Pia mega aku ngarapka GPS ukai semina menang ba DUN Katibas tang serata nengeri Sarawak.

“Pemujur tu deka mandang ngagai Perintah Besai, kitai kering di Sarawak nengah pegai GPS,” ku iya madah ba Pengerami Pemesai Begulai Enggau Rayat di Rumah Kelau, Nanga Lijau, Ulu Batang Rajang, kena Hari Dua.

Ba pengerami nya, iya bisi nyuaka Projek Mit Menua Pesisir (MRP) Parlimen Kapit ngagai 24 iti Komiti Pemansang enggau Pengelikun Genturung Pendiau (JKKK) Menua Pegai Penghulu Lebon enggau penyampau RM268,000.

Dato’ Sri Alexander ke mega Kaban Parlimen maya nya bekunsika sentang pegai Pakatan Harapan (PH) ba pengelama 22 bulan sebedau tu.

“PH udah diberi awak nyadi perintah tang sida enda mujur lalu semina nyadi perintah dalam kandang 22 bulan aja.

“Ba timpuh nya, PH ukai semina enda besepenemu enggau Perintah Sarawak tang betalat enggau pangan diri,” ku iya madah baru.

Nangkan ke nya, chalun GPS ba DUN Katibas, Lidam Assan besemaya deka meri servis ke pemadu manah ngagai rayat nyema iya dipilih ba Pengawa Bepilih Besai Nengeri Ke-12 tu ila. -EDISI UKAS