PRN-12 Sarawak: GPS Ngaga Projek Ke Enda Dipenyadi Sebedau Tu

HARI EMPAT, 9 DISEMBER 2021

KUCHING: Sepemanjai timpuh Pakatan Harapan (PH) megai Perintah Besai suba, mayuh projek Sarawak enda dipenyadi kelimpah agih belanja ke udah diberi dibatak pulai.

Chairman Gabungan Parti Sarawak (GPS) Datuk Patinggi Tan Sri (Dr) Abang Abdul Rahman Zohari Tun Datuk Abang madah, tang taja pia, GPS ransing deka nandu projek pemansang nya ngena belanja ari Perintah GPS empu.

“GPS udah ngaduka lebih 100 inisitif ti nyadika ‘game changer’ dikena nyungkakka agi pemansang sosio-ekonomi Sarawak ke udah mai mayuh pemaik enggau pengelantang ngagai peranak nengeri tu,” pia ku iya madah.

Iya bejaku munyi maya bejadi Manifesto GPS Pengawa Bepilih Besai Nengeri Ke-12 (PRN12) Sarawak di Kuching, kena Hari Tiga.

Sekeda ari projek besai ke benung digaga nya baka diayanka tu:

1. Ngaga 786 Km jalai besai Pan Borneo enggau ungkus RM16.1 bilion, dipelabaka tembu taun 2024.

2. Ngaga 242 KM Projek Jalai Besai Kedua ke nyengkaum tiga iti jematan iya nya di Sungai Lingga, Batang Saribas 2 enggau Batang Lupar 2 nengah ungkus RM6 Bilion ti dipelabaka tembu dalam taun 2026.

3. Ngaga 896 KM Projek Jalai Nebing Sungai ti nyengkaum 10 iti jematan iya nya di Batang Rajang, Batang Saribas, Batang Paloh, Nanga Lassa, Bintulu-Jepak, Batang Rambungan, Batang Lupar 1, Sungai Sarawak-Sejingkat, Sungai Krian enggau Batang Igan ti dipelabaka tembu taun 2028.

4. Sistem Transit Aliran Automasi (ART) Kuching ti nyengkaum ngaga dua batang jalai lalu disadang berengkah ulih dikena taun 2025.

5. Ngaga 300 tiang telekomunikasyen ti dipelabaka tembu ba taun 2022 ke ngembuan tuju nyungkakka pemanah bungkur internet di Sarawak. Pemansang infrastruktur 5G ke deka berengkah taun 2022 nengah kerejasama Digital National Berhad enggau

6. Nambahka penyampau 100% bungkur projek ai enggau karan ba taun 2025. Nyentukka diatu 66.5 peratus menua pesisir udah disambung ai beresi lalu 96 peratus bisi karan 24 jam.

Iya mega madah, Sarawak Metro Sdn Bhd nyadi anak kompeni enggi Sarawak Economic Development Corporation (Sedc) megai tanggungpengawa ngemansang sereta ngaduka ART.

Naka ke diatu, langkar projek benung digaga lalu projek dipelabaka deka berengkah taun ke deka datai iya nya suku ketiga taun 2022.

Nambahka nya, naka ke diatu mega GPS udah ngungkupka agih RM1.06 bilion dalam kandang tiga taun ngaga 6,427 Projek Transformasyen Menua Pesisir (RTP) ba serata Sarawak kelimpah bekenaka belanja RM5.3 bilion ba 7 pakej Bantu Khas Sarawakku Sayang (BKSS).

Dikena ngaduka baru pemanah ekonomi Sarawak udah COVID-19 sereta bejadika juluk ati nyadi nengeri mansang 2030, GPS mega udah numbuhka Pelin Pemansang Udah COVID-19 (PCDS 2030) kena 22 julai 2021.-EDISI UKAS

add comment