PRN12 Sarawak: Azizul Mutus Nandu Pengeransing Ngemansangka DUN Tanjung Datu

HARI EMPAT, 9 DISEMBER 2021

LUNDU: Pemutus Gabungan Parti Sarawak (GPS) ‘nyabung’ beberapa iku orang baru sereta agi biak ba Pengawa Bepilih Besai Nengeri Ke-12 (PRN12) Sarawak ngelai GPS bela ngemana sereta nerima penemu raban nembiak.

Tu seririh enggau juluk ati ngemansangka Sarawak bepelasarka Ekonomi Digital ti randaka penemu sereta pengeregas dikena nempa Sarawak nyadi nengeri bepenatai pemisi besai sereta mansang.

Siku ari chalun GPS ba penuduk Kunsil Nengeri (DUN) N.3 Tanjung Datu iya nya Azizul Anuar Adenan, 30 taun ti nyadi chalun pemadu biak dikeandalka GPS majakka pemansang ba sitak DUN nya.

Iya anak ngagai ex-Kepala Menteri Niang Pehin Sri Adenan Satem deka ngelaban tiga iku chalun iya nya ari Parti Sarawak Bersatu (PSB), Parti Bumi Kenyalang (PBK) enggau chalun ngatika diri.

Ba video pandak Tim Azizul udah tembu pengawa ngantung nama empai lama tu tadi, Azizul ngarapka bala pengundi ba DUN N.3 Tanjung Datu meri sukung ngagai iya ba PRN12 Sarawak tu.

“Aku ngarapka rayat pechayaka aku mai pemansang ngagai DUN N.3 Tanjung Datu dalam kandang lima taun ke deka datai.

“Aku minta sukung semua kita,” pia ku iya.

Azizul udah lama dikelala rayat ba penuduk nya kenyau ari maya niang apai iya nyadi pengari rayat dia sebedau diteruska indai iya ke menang ba Pengawa Bepilih Mit (PRK) taun 2017.

Iya mega besemaya deka bejalaika pengawa enggau manah nyema dipilih nyadi pengari rayat dia lalu bepegai ba jaku tangkan niang apai iya suba.

“Apai maya iya agi bisi suba suah amat madah, enti deka ngaga sesebengkah pengawa, gaga enggau manah sereta bebendar.

“Jaku nya nyadika pengering ngagai aku,” ku iya maya dirandau udah ke nerima ‘watikah’ nyadi chalun GPS sebedau tu.

Ba taun 2018, Azizul dipadu nyadi Tuai Raban Nembiak PBB Tanjung Datu ti nyadi awak endur iya begigaka peneleba.

Maya ditanya sentang juluk ati iya nyema dipilih nyadi pengari rayat ba DUN N.3 Tanjung Datu, iya madahka diri deka neruska pengawa ngaduka pemansang ba semua sektor nyengkaum ekonomi, rama enggau infrastruktur.

“Aku ngasaika diri megai tanggungpengawa ke besai nyaga DUN N.3 Tanjung Datu tu ti nyau lebih agi besai ari Nengeri Sembilan.

“Agi mayuh pekara ke deka digaga nyengkaum ngangkatka Tanjung Datu dikelala nyadi palan endur nemuai ke tebilang ba selatan Sarawak,” ku iya madah baru.

Ba PRN-11 Sarawak, niang Pehin Sri Adenan menang ba penuduk nya enggau majoriti 5,892 undi lalu ba PRK 2017, Datuk Amar Jamilah Anu mujur ngetanka penuduk nya nengah majoriti ke besai agi iya nya 6,573 undi. -EDISI UKAS

add comment