Rikod Tikas Gawa Nyadi Kelai Pengawa Digaga GPS

HARI EMPAT, 9 DISEMBER 2021

KUCHING: Rikod tikas gawa Gabungan Parti Sarawak (GPS) deka nyadika kelai ngagai semua pengawa ke udah digaga ngagai rayat ngelama tu.

Kepala Menteri Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg ke mega Chairman GPS madah, rayat empu ulih meda nama ke udah digaga parti sida lebih agi maya nyaup rayat betapi enggau pandemik COVID-19.

“Pengawa bepilih serak tu, rayat ulih meda rikod ke udah digaga. Aku enggai bejakuka orang bukai. Kita ulih meda rikod kami.

“Ba empat taun ke udah, aku ngambi penuduk niang Tok Nan, aku nandu pengawa kitai baka ba MA63, minyak enggau gis.

“Keterubah iya pengawa digaga aku nyadi Kepala Menteri iya nya aku ngambi Bakun, Bakun udah diempu kitai. Nadai orang ulih mantah pekara tu,” pia ku iya maya bejadi ba Pengerami Nasih Tanah Palan Bedagang Kota Sentosa, kena Hari Tiga.

Kepala Menteri mega minta rayat berati baru nama ke udah dipansutka ba media rama lebih agi maya bepilih tu.

“Aku manggai ngagai kita semua berunding sereta beratika silik nama ke udah dipansutka nengah laman media, tang ba aku enggau tim aku, kami endang gaga bebendar ketegal rayat,” ku iya madah.

Sama bela datai, Menteri Perintah Menua enggau Pengawa Berumah Sarawak, Dato’ Seri Prof Dr. Sim Kui Hian enggau Chairman Majlis Perbandaran Padawan, Ir. Lo Khere Chiang.-EDISI UKAS

add comment