PRN-12: Perintah GPS Sarawak Semampai Chakah Ngerapitka Seraka Pemansang Mengeri Enggau Menua Pesisir

HARI ENAM, 11 DISEMBER 2021

PAKAN: Perintah Gabungan Parti Sarawak (GPS) semampai chakah ngerapitka agi seraka pemansang kandang mengeri enggau menua pesisir.

Sapit Kepala Menteri Datuk Amar Awang Tengah Ali Hasan madah, pekara nya nyadika pelasar ngagai pemujur bejadika juluk ati perintah deka meda Sarawak nyadi nengeri mansang ba taun 2030.

“Kitai naka alah ngerapitka agi seraka pemansang kandang mengeri enggau menua pesisir.

“Ari nya, kitai deka nentuka pemansang baka jalai alun, jematan, karan, ai enggau telekomunikasyen semampai ditumbuhka,” pia ku iya madah.

Iya bejaku munyi nya maya pengawa nyuaka surat pala tanah Seksyen 18, Kanun Tanah Nengeri di Sarikei, kena Hari Empat.

Ba pengawa nya, 379 iti surat pala tanah Seksyen 18 udah disuaka ngagai sida ke beempu Tanah Adat Bumiputera (NCR) ba Pakan/Sesco enggau Pakan-Entabai.

Ba pekara bekaul, Opis Tanah Enggau Survei Sitak Sarikei udah ngaduka program inisiatif baru nyukat tanah NCR ba pelilih Sarikei, Meradong, Pakan enggau Julau.

Naka ke diatu udah bisi 27 endur enggau urung 171,756.11 hektar tauka 424,416.9 ekar pemesai tanah udah dikemendarka perintah disukat nengah inisiatif baru nyukat kelinggi NCR.

Ari semua penyampau nya, 25 iti endur udah disukat enggau pemesai 142,072.11 hektar lalu digazet nyadi rizab komunal bumiputera nengah Seksyen 6 Kanun Tanah Negeri Sarawak kelimpah dua iti agi endur iya nya di Tulai enggau Tekoyong bela udah tembu disukat lalu diatu benung digagaka gazet.

Sama bela datai Speaker Kunsil Nengeri Sarawak, Tan Sri Datuk Amar Mohd Asfia Awang Nassar, chalun GPS DUN Pakan Tan Sri William Mawan Ikom sereta bala ke bukai.-EDISI UKAS

add comment