HARI MINGGU, 12 DISEMBER 2021
SAMARAHAN: Perintah Sarawak udah meri aset ke dikena nyaga entara menua dikena nyaup nyungkakka agi tikas pemanah pengawa nyaga pengelikun enggau 20 iti komputer ba Kem Muara Tuang.
Bejaku ba pengerami bejadika Aset Nyaga Entara Nengeri Sarawak enggau bejadi Innovation Digital Centre, kena Hari Enam tu tadi, Kepala Menteri Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, pemeri nya dikena ngelai perintah beterima kasih ngagai raban terabai menua.
“Aku enggau gaga ati madahka Perintah Sarawak deka meri aset pengelikun nyaga entara menua ngagai ATM di Sarawak.
“Ngarapka pemeri tu deka nyungkakka agi tikas pemanah gawa nyaga pengelikun ba entara menua Sarawak,” pia ku iya madah.
Perintah Sarawak nengah inisiatif Pakej Pengetan Pengelikun 1 Divisyen meri aset nyengkaum telekomunikasyen digital, dron enggau Palan Operasyen, Ford Ranger RAPTOR enggau Palan Digital Komuniti ke diberi 60 iti komputer ungkup anak raban soldadu enggau semua ungkus RM75 juta.
Kelimpah ari nya, Kepala Menteri madah, enggau perengka guna teknologi pemadah nya, iya ngarapka ulih nyaup raban soldadu ngemansangka pelajar anak sida. -EDISI UKAS
