Rumah Spektra Deka Ditambah Ba RMK12, Perintah Sarawak Nyaup Mayar Deposit RM10,000

HARI DUA, 14 DISEMBER 2021

SIBU: Perintah Sarawak deka nambah penyampau Rumah Spektra di nengeri tu nengah Langgur Pemansang Malaysia Lumpar Ke-12 (RMK12).

Kepala Menteri Datuk Patinggi Tan Sri Dr Abang Abdul Rahman Zohari Tun Datuk Abang Openg madah, ari penyampau penatai nengeri tu ke bisi nambah, Perintah Sarawak nadai penanggul nambahka penyampau rumah nya ba serata Sarawak.

“Kebendar iya ba RMK11, kitai udah ngaga 2,470 buah rumah RSP enggau ungkus RM259 juta.

“Lalu ba RMK12 tu kitai deka ngaga 1,820 buah rumah sereta deka ditambah ketegal kitai ngira rayat.

“Enggau penatai nengeri kitai ke majak nambah diatu, Perintah Sarawak mega deka mayuh agi ngaga rumah serata nengeri,” ku iya madah.

Iya bejaku munyi nya maya bejalai ngagai Projek Rumah Spektra Permata Kemuyang Sibu, kena Hari Satu.

Naka ke diatu bisi 110 buah Rumah Spektra udah digaga sereta tembu di Kemuyang ungkup sida ke ditinggang penusah angus taun 2013 suba.

Nambahka jaku iya, Kepala Menteri madah, Perintah Sarawak numbuhka atur baru ba pengawa bebelika rumah.

Ku iya, bala nembiak ke baru beruang bilik sereta bisi anak nyangka empai bisi belanja dikena mayar deposit rumah.

“Nya alai, kitai numbuhka bantu dikena nyaup sida mayar RM10,000 deposit,” pia ku iya madah baru.

Ba pengawa nya, Kepala Menteri nyuaka replika kunchi ngagai empat iku penerima Rumah Spektra ke udah tembu.

Pengawa sehari nya bela digulu Menteri Muda Pekara Pelajar, Sains enggau Pansik Teknologi, Menteri Pengawa Berumah enggau Pengerai Mensia Mayuh Dr Annuar Rapa’ee enggau Sapit Sekretari Perintah Sarawak (Transformasyen Sosio Ekonomi) Dato Sri Mohamad Abu Bakar Marzuki. -EDISI UKAS

add comment