HARI TIGA, 15 DISEMBER 2021
SIMUNJAN: Pengawa bekenaka teknologi digital diatu nyadi batang pekara dikena ngemansangka nengeri Sarawak.
Kepala Menteri Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, maya hari tu, teknologi digital dikena ngaduka pengawa betanam betupi, sekula enggau pengawa dagang.
Iya bejaku munyi nya maya Pengerami Bejadika Sarawak Linking, Urban, Rural And Nation (SALURAN-MySRBN) Simunjan di Padang Sentral Simunjan, kena Hari Dua.
Ku iya, pengawa numbuhka MySRBNdi Simunjan deka ngemuntangka rayat dia bisi arus internet ke manah.
“Tu dikena kitai nyaup menua tusah datai internet alai MySRBN tu deka meri rayat sambung internet baka di endur bukai,” ku iya madah.
Nambahka jaku iya, Kepala Menteri madah, pemutus ngangkatka Gedong, Lingga enggau Sebuyau nyadi pelilih deka nentuka pelin pemansang ba menua pesisir ulih diaduka meruan agi.
“Rayat ba menua nebing sungai baka di Simunjan, Gedong, Asajaya, Sadong Jaya, Sebuyau nyentuk ke Lingga, mandangka pemansang kita deka berurun agi kelimpah ngemuntangka kitai meri servis ke pemadu manah.
“Nya alai kitai numbuhka pelilih menua ngambika servis perintah muntang diaduka nyengkaum nyediaka servis internet tu,” pia ku iya madah baru.
Dulu ari nya Chairman Sarawak Digital Economy Corporation Berhad (SDEC), Tan Sri Datuk Amar Mohamad Morshidi Gani madah, MySRBN digaga ari belanja perintah nengah SDEC nyadi kelai pengeransing nentuka arus internet ba menua pesisir ulih dikemanahka ari 54.2 peratus ngagai 93.6 peratus manggai ujung taun 2022.-EDISI UKAS
