Pilih Pengari Ke Ulih Mai Pemansang: Chairman GPS

HARI LIMA, 17 DISEMBER 2021

KUCHING: Chairman Gabungan Parti Sarawak (GPS) Datuk Patinggi Tan Sri (Dr) Abang Abdul Rahman Zohari Tun Datuk Abang Openg minta rayat Sarawak landik ngaga pemutus maya ngundi Pengawa Bepilih Besai Nengeri (PRN) Sarawak Ke-12 ke deka diatur pagila, 18 Disember 2021.

Kepala Menteri Sarawak nya madah, ari kuasa tauka mandat diberi rayat, GPS deka chakah nandu pengawa nentuka pengelikun, penegap politik enggau pemujur ekonomi Sarawak diatu enggau dudi hari ila.

Ku iya, Tim GPS deka majakka pelin pemansang sosio-ekonomi ba chara nempa penatai pemisi ke baru, numbuhka mayuh awak dagang sereta kereja puang ungkup raban nembiak nangkan ke tu.

Ba penerang ‘Peminta Ngagai Semua Pengundi Di Sarawak’ sehari tu tadi ti dipansutka ngena empat bansa jaku, iya madahka GPS mega deka ngetanka pengelantang menua Sarawak ngambika rayat majak ngasaika penumbuh enggau pemansang ekonomi ti dipelin enggau manah, holistik sereta inklusif.

Nambahka jaku iya baru iya madah, tu seririh enggau pemeras GPS nyaga sereta ngetan hak Sarawak nitihka sempekat Malaysia 1963 (MA63), Laporan Jawatankuasa Antara Kerajaan,, Konstitusyen Nengeri Sarawak enggau Konstitusyen Malaysia.

Pemeras GPS nya tebantai enggau pemendar diberi ngagai Rang Undang-Undang Perlembagaan (Pindaan) 2021 bekaul enggau MA63 di Dewan Rakyat kena 14 disember 2021 tu tadi.

Ba penerang ke sebaka, Datuk Patinggi Tan Sri Abang Zohari madah, pengelantang enggau pemujur nengeri Sarawak dudi hari bepanggai ba perintah ti kering, tegap sereta ngembuan pengeransing ngetanka hak rayat enggau nengeri sarawak.

Ku iya, GPS bisi pengelebih megai tanggungpengawa nya ari peneleba ke dikembuan, penyikal kelimpah dipebasa, ngembuan integriti lalu bisi rikod pemanah gawa.

Ketegal nya, iya ngarapka peranak Sarawak landik milih sapa pengari ke tau nyadi perintah nengeri Sarawak.-EDISI UKAS

add comment