Pemujur GPS, Pemujur Semua Rayat Sarawak: Kepala Menteri Sarawak

HARI ENAM, 18 DISEMBER 2021

KUCHING: Kepala Menteri Datuk Patinggi Tan Sri (Dr) Abang Abdul Rahman Zohari Tun Datuk Abang Openg madahka pemujur Gabungan Parti Sarawak (GPS) ba Pengawa Bepilih Besai Nengeri (PRN) Sarawak Ke-12 bela pemujur ngagai rayat nengeri tu.

Ku iya, pemujur nya deka nyaup pengeransing perintah nengeri mai Sarawak nyingkang ngambika sama tikas enggau Semenanjung ke bela nempa menua Malaysia.

Iya madah, kuasa ke diberi rayat ngagai sida ngelai penegap politik beguna bendar dikena nandu pemansang ba nengeri Sarawak.

“Enggau kuasa enggau pengandal ke diberi ngagai kitai (GPS), kitai deka nandu pengawa ngemansangka ekonomi enggau pengawa rama ti ngemeranka pengelantang rayat.

“TU mai reti ngagai pemujur nengeri tu nyingkang ngelawa taun 2030 ke disaup semua enda ngira bansa enggau jalai pengarap,” pia ku iya maya bejaku beserimbai enggau pemujur GPS ba Palan Konvensyen Borneo Kuching (BCCK), malam tadi.

Kaban Kunsil Nengeri (ADUN) Gedong nya mega minta semua raban sida bela bejadika semaya baka ba manifesto pengawa bepilih ngagai rayat.

Kepenudi, Kepala Menteri ngenataika jaku terima kasih ngagai semua pengundi, raban gawaka parti sereta raban pemesai parti ke udah besaup nentuka pemujur GPS ba PRN serak tu.

Ba PRN Sarawak Ke-12, GPS menang ba 76 ari 82 penuduk ti mega meri banding ke besai ba pemutus PRN Sarawak Ke-11 taun 2016 suba ke menang ba 72 penuduk nengah parti Barisan Nasional (BN).

Sama bela datai maya tu iya nya Sapit Kepala Menteri Datuk Amar Douglas Uggah Embas, Menteri Perintah Menua enggau Pengawa Berumah Dato Sri Prof Dr Sim Kui Hian sereta bala temuai ke dipebasaka kebukai. -EDISI UKAS

add comment