HARI SATU, 20 DISEMBER 2021
KABONG: ADUN N40 Kabong, Mohd Chee Kadir minta rayat dia meri sukung sereta kerejasama ngagai iya ngambika pengawa ulih digaga enggau muntang agi.
Pia mega ku iya, sida ke enda nyukung iya tau berati baru pengawa ke udah digaga dalam kandang lima taun tu lalu ngubah runding sida bepelasarka penemu deka nempa pemansang ke meruan agi dudi hari ila.
Maya bejaku beserimbai enggau pemujur iya ba Pengawa Bepilih Nengeri Besai Sarawak Ke-12 Hari Enam tu tadi, Mohd Chee besemaya deka bejalaika tanggungpengawa enda bechiping ngagai genap iku rayat enda ngira bansa enggau jalai pengarap lebih agi ba pengawa ngungkupka agih belanja Projek Transformasyen Menua Pesisir (RTP) enggau projek bukai.
Ba pada PRN-12, Mohd Chee menang enggau undi 4,789 iti ngalahka Wan Mohamad Wan Ali ari Parti Sarawak Bersatu, Mohamad Asri Kassim ari Parti Bumi Kenyalang enggau chalun AMANAH, Hud Andri. -EDISI UKAS
