JPBN Sarawak Datai Ngabas Sida Ke Ditinggang Penusah Di Taman Moyan Utama

HARI DUA, 21 DISEMBER 2021

KUCHING: Penusah ke ditapi sida ke beempu rumah di Taman Moyan Utama ti dipangka kudi hari minggu tu tadi matak penyinu Komiti Penyangga Penusah Nengeri (JPBN) Sarawak.

Pemangku chairman komiti nya ke mega Sekretari Perintah Nengeri Sarawak, Datuk Amar Jaul Samion udah datai ngabas penusah nya lalu beratika pengawa meri bantu wang ari sarawak enggau perintah besai, kena Hari Satu.

Kelimpah ari nya, Opis Kereja Raya (JKR) mega bisi datai ngabas penusah nya lalu pia mega Ejensi Pengatur Penusah Menua (NADMA) enggau Opis Pengintu Pengelantang Mensia Mayuh (JKM) Sarawak bela nganjung bantu pemakai.

Opis Bomba Enggau Penyah Penusah Malaysia (BBPM) enggau raban Pengetan Pengelikun Periman (APM) datai nyaup meresi genturung pendiau dia.

Chairman Parti Saati Rayat Sarawak (SUPP) Dato’ Sri Sim Kui Hian maya dirandau madahka iya enda lantang ati enggau ulah malut penusah ke nuntung rayat dia enggau pekara politik taja pengawa bepilih empai lama udah tembu.

Ku iya, pekara ke beguna diatu iya nya meri bantu ngagai rayat ke ditinggang penusah nya. -EDISI UKAS

add comment