Rayat Nemu Tuju Program Perintah Sarawak Ngelawa Nengeri Mansang 2030

HARI DUA, 21 DISEMBER 2021

KUCHING: Pemujur Gabungan Parti Sarawak (GPS) ba pengawa bepilih tu tadi mandangka rayat pechayaka pegai parti nya.

Kepala Menteri, Datuk Patinggi Tan Sri (Dr) Abang Abdul Rahman Zohari Tun Datuk Abang Openg madah, rayat berengkah nemu tuju pengawa perintah ke deka mai nengeri tu mansang manggai taun 2030.

“Rayat udah nemu baka ni kuing atur program pemansang ke dibai aku nyengkaum penegap politik ti ngemansangka rayat, program pemansang diungkupka ngagai semua pengarap enggau bansa sereta penuduk nengeri tu nitihka Sempekat Malaysia 1963 ke udah dikemendarka Parlimen.

“Tu nyadika pemun GPS menang lalu integriti ke dikembuan kami baka ke disemaya lebih agi ba pengeransing kitai deka nandu pengawa niang Tok Nang tang ngena chara aku empu,” pia ku iya maya pengerami hari keterubah iya tama ke opis udah iya menang ba Pengawa Bepilih Besai Nengeri Sarawak Ke-12 (PRN-12) di Wisma Bapa Malaysia ditu, kena Hari Dua.

Nambahka jaku iya, Kepala Menteri madah, pemanah kaul pengereja pengawa perintah enggau perintah nengeri beguna bendar dikena ngemujurka program pemansang rayat.

“Rayat bekenaka aku bejadika nama ke udah disemaya aku ngagai sida tang mayuh projek lubah digaga lalu aku ngarapka semua sida ke bekaul ulih beratika pekara tu.

“Beberapa bengkah atur pengawa patut diserenih baru laban bisi nya kelalu udah lama. Diaduka ngena teknologi pemadu baru ti lebih agi praktikal,” ku iya madah baru. -EDISI UKAS

add comment