HARI TIGA, 22  DISEMBER 2021

KUALA LUMPUR: Menteri Pemansang Orang Indu, Ruang Bilik enggau Mensia Mayuh berengkah mansik pekara ke patut digaga enggau tanggungpengawa ejensi ti bekaul dikena nyaga servis ngibun anak mit ari rumah.  

Menteri ba opis menteri tu, Datuk Seri Rina Harun madah, pansik ti digaga bepelasarka pengelikun anak mit ke dijaga sereta chara ke dikena enggau engkeman.

Iya nerang, opis iya benung bejalaika pengawa terus begulai enggau ejensi ti bekaul bepun ari pekara nya bekenaka pemutus ari pun sebedau ngaga servis ngibun anak mit ba rumah ‘klien’ nyadi siti sistem sukung ba ruang bilik.

“Ngarapka kerejasama tu ulih meri awak ngagai bala apai indai gawa lebih agi sida ke indu ke bela gawa lalu nyaup nyungkakka penatai menua,” pia ku iya madah.

Iya madah munyi nya ba Dewan Rakyat maya nimbal tanya Kaban Parlimen Batang Lupar, Dato’Sri Rohani Abdul Karim bekaul enggau pelin pemansang opis nya nyediaka servis orang beribun anak mit ari rumah ‘klien’ enti dibanding enggau palan beribun, ketegal apai indai milih ngibun anak sida ba rumah dikena nyeliahka anak sida ari pengelekai COVID-19 kelimpah anak sida ngaga PdPR.

Nambahka jaku iya, Datuk Seri Rina madah, opis menteri iya nemu servis nya nyadi chara ke baru ba pengawa nyaga anak mit di Malaysia bepun ari gaya idup baru ketegal pandemik COVID-19.

“Ketegal pekara nya, opis menteri kitai udah berengkah ngaduka pengawa beratika nama ke patut digaga sereta tanggungpengawa ejensi ke bekaul.

“Kebuah pia, naka kediatu Akta Taman Asuhan Kanak-Kanak 1984 diungkupka ngagai nembiak baruh umur empat taun aja enggau Akta Pusat Jagaan 1993 ba baruh Opis Pengintu Pengelantang Mensia Mayuh (JKM) semina dikemendarka alai ngerejister, nyaga enggau meresa TASKA enggau Palan Beribun. – EDISI UKAS