HARI SATU, 27 DISEMBER 2021
KUCHING: Raban mudah kena ampuh bah dipinta ngadang tumu.
Opis Menteri Pengerai Malaysia (KKM) nengah sebengkah infografik ke dipandang ba laman ‘facebook’ rasmi Opis Pengerai Nengeri Sarawak (JKNS) Hari Enam, minta sida mindah nyema bisi nerima gerah.
KKM mega ngelalau mensia mayuh nitihka 9 chara nagang kena rampit penyakit maya ampuh bah iya nya, seliahka bemain tauka nujah ai bah, kena pekayan nyaga diri (PPE) maya mantu orang tasah bah, berumban meresi diri nyema tubuh bisi kena ai bah, basu jari enggau betul lalu seruran jaga pemeresi diri, anang ngena ai bah mandi, betuchi tauka nyumai, seruran ngena ai beresi diirup, makai, bebasu enggau mandi, serurun tuchi palan ngenduh ngambika lalat enggau chit enda betugung, ngena ppe maya meresi rumah enggau kandang endur ke udah kena bah, lalu berubat lengkas nyema bisi tabin.
Dulu ari nya, Opis Kepala Menteri Sarawak mansutka penerang minta mensia mayuh ke mudah kena bah ngadang tumu laban hari ujan disadang nyadi kena hari tiga enggau hari empat ba sitak barat Sarawak.
MetMalaysia mansutka penerang nya bepelasarka pansik sistem gaya hari lalu melabaka hari berunggu ujan bepun 27 nyentuk 29 Disember tu ketegal ubah monsun.-EDISI UKAS
