HARI TIGA, 29 DISEMBER 2021

KUCHING: Raban orang gawa perintah patut seruran ransing ngangkatka produktiviti dikena nyuangka pemansang nembiak enggau lumba ba Sarawak.

Ba pengerami Malam Meri Basa MYSS 2021 di Hotel Pullman, Kuching kemari, Dato’ Sri Abdul Karim Rahman Hamzah madah, penemu ba bidang teknologi pemadah enggau penyambung (ICT) endang dikena nyamin sistem servis nyadi lebih produktif, bekualiti enggau nyulut.

Iya mega madah, kelimpah ari nya integriti mega beguna dikena ngenataika servis ke lebih manah ngagai rayat.

Ari ulah integriti ke dipandang, mensia mayuh deka arapka raban orang gawa perintah.

Kenu ku Dato Sri Abdul Karim mega, orang ke gawa perintah nyadi ejen pengubah ke pemadu dulu enggau nyadi orang tengah ngemujurka agenda transformasyen menua.

Kenu ku iya, genap orang gawa perintah mega patut nitihka atur gawa ninting hari ke dipangku diri laban opis menteri chukup begunaka orang gawa ti professional, progressif, pintar enggau bebendar nyapai visyen enggau misyen opis menteri.

Nangkan ke nya, Dato Sri Abdul Karim bisi nyuaka tanda basa ngagai 39 iku orang gawa perintah ba opis menteri nembiak enggau lumba sarawak ke nerima ‘Anugerah Perkhidmatan Cemerlang’ (APC), nyengkaum 15 iku pegawai pinchin, enggau 5 iku Pelatih Industri Graduet Sarawak (GETS).

Sama bisi datai ngulu program iya nya ADUN N.3 Tanjung Datu Azizul Annuar Adenan, ADUN N.30 Balai Ringin Datuk Snowdan Lawan enggau bini iya serta Presiden Persatuan Tennis Sarawak Datuk Patrick Liew. -EDISI UKAS