Pengawa Nyiri Nyadi Menteri Siti Pengarap, Tanggungpengawa Besai : Datuk Julaihi

HARI ENAM, 1 JANUARI 2022

KUCHING: Datuk Julaihi Narawi meri besai terima kasih ngagai Kepala Menteri Sarawak, Datuk Patinggi Tan Sri (Dr) Abang Abdul Rahman Zohari Tun Datuk Abang Openg laban udah arapka iya mangku pengawa nyadi Menteri Utiliti enggau Telekomunikasyen Sarawak ke baru. 

Kenu ku iya, pangku pengawa nya siti pengarap enggau tanggungpengawa ke patut dikereja begulai enggau bala bakih dalam opsi menteri enggau semua staf opis sereta ejensi bekaul nyendiaka bekal ai beresi, karan enggau bungkur telekomunikasyen ba selampur menua manggai taun 2030. 

Ba sebengkah penerang Hari Lima, iya madah ngena peneleba gawa lebih 10 taun dalam kabinet nengeri Sarawak enggau Kepala Menteri sereta semua bakih kabinet baru ngemansangka Sarawak.

Pia mega iya besemaya deka bejalaika pengawa enggau manah dalam siti tim begulai enggau Kepala Menteri, Datuk Patinggi Tan Sri Abg Zohari.

Datuk Julaihi entara Menteri Muda ke niki pangkat nyadi menteri penuh dalam kabinet baru Sarawak.

Iya kala mangku pengawa nyadi Menteri Muda Industri (Pemeranak Puku enggau Promosyen) enggau Menteri Muda Pemansang Menua Pesisir ari 2011 nyentuk 2016.

Udah nya, ari 2016 nyentuk 2017, iya dipadu nyadi  Menteri Muda Ekonomi Menua Pesisir (Sitak Tebing Pantai) Enggau Pengawa Berikan, udah nya Menteri Muda Pemansang Industri (Pemeranak Puku enggau Promosyen) sebedau  dipadu nyadi Menteri Muda Jalai Tebing Pantai Sarawak ari 2017 nyentuk 2019.

iya udah nya, dipadu nyadi Menteri Muda Infrastruktur enggau Pemansang Penyangkai Kapal Sarawak ari 2019 nyentuk 2021.-EDISI UKAS

add comment