Perintah Deka Ngemeratka Atur Nyumanka Ekonomi: PM

HARI ENAM, 1 JANUARI 2022

KUALA LUMPUR: Perintah deka terus ngemeratka atur nyumanka ekonomi nengah bemacham inisiatif ke udah dibantai dalam Langgur Pemansang Malaysia Lumpar Ke-12 (RMK12) enggau Bajet 2022 dikena nentuka penegap ekonomi enggau pengelantang Malaysia Sebilik. 

Kenu ku Menteri Besai, Dato’ Sri Ismail Sabri Yaakob, dikena nyapai juluk nya, pekara ti dikemerat perintah ba taun 2022 iya nya numbuhka abis nadai 600 ribu pengawa puang baru kelimpah lengkas nyumanka Sektor Dagang Mikro Mit enggau Jelan Pemesai (PMKS).

Ku iya, taun 2022 mega nyadi taun endur Malaysia pulai baru nentuka pelin ekonomi menua ungkup timpuh panjai.

Ba pesan taun baru 2022 kena Hari Lima, Dato’ Sri Ismail Sabri mantaika pengaga ati diri laban RMK-12 dikemendar enggau nadai sebarang penanggul sebarang ubah kena 7 Oktober nyengkaum Bajet 2022 mega udah dikemendar nengah sukung majoriti kena  13 Disember tu tadi.

Pekara ke lebih meri pengaga ku iya lebuh Rang Undang-Undang Kunstitusyen (Ubah) 2021 bekaul enggau Sempekat Malaysia 1963 (MA63) dikemendarka semua Kaban Parlimen ke bisi datai sepenyampau 200 iku.

Ku iya, pekara dikemeratka perintah diatu iya nya ngamatka peminta rumah ungkup rebak baru  Malaysia Sebilik lalu pekara tu mungkur  teknologi pintar tauka ‘Artificial Intelligence’ nengah konsep ‘Smart Safe City’ ti dibantaika berenggat bepun ba semua mengeri besai ba selampur menua.

Tandu Menteri Besai mega, perintah udah bejalaika sekeda atur penyikap dikena napi sebarang penyadi ketegal penyakit ke ngerekai ba menua tu lebih agi baka varian baru COVID-19 iya nya Omicron.-EDISI UKAS

add comment