Program Latih Ampuh Bah Chara Baru, Nyeliah Pengerekai COVID-19

HARI ENAM, 1 JANUARI 2022

KOTA SAMARAHAN: Program latih ampuh bah dikena nentuka Komiti Penyangga Penusah seruran ngadang nengah chara baru enggau nitihka Atur Pengawa Standard (SOP).

Pegawai Pelilih  Samarahan ke mega Chairman Komiti Penyangga Penusah Pelilih Samarahan, Anuar Da’an madah, program ke sama mega deka dikena nyikap mensia mayuh ngambika seruran ngadang napi sebarang penusah ke enda disadang.

Ku iya, latih napi ampuh bah nya beguna amat beduduk ari nengeri tu agi benung ngadang kelimpah nagang pengerekai COVID-19.

Ba program latih ke diatur ba Sekula Primari Endap, Kota Samarahan Hari Empat, iya madah bisi 28 buah palan pengentap sementara ungkup raban tasah bah udah dikelala.

Kenu ku iya, genap peranak menua nya patut seruran ngadang diri napi penusah ampuh bah sebedau raban pengelikun datai ngesah.

Program latih nya dikemujurka ejensi perintah ba Samarahan mungkur Raban Opis Pengintu Pendiau Raban Bansa, Raban Penyaga Orang Periman Malaysia, Opis Pengerai, Polis Diraja Malaysia, Raban Soldadu Malaysia, Opis Bomba enggau Penyah Penusah, Opis Pelilih enggau Unit Pengelikun enggau Penerit Adat Nengeri (UKPN) Sarawak.-EDISI UKAS

add comment