Peminta Darah Ba Sepital Miri Betambah Ninting Taun

HARI MINGGU, 2 JANUARI 2021

MIRI: Sepital Miri ba penuduk ketiga dalam ngumpul darah di Sarawak nangkan Sepital Besai Sarawak (HUS) di Kuching enggau Sepital Sibu.

Taja pia, peminta darah ba sepital Miri mega nambah ninting taun.

Kenu ku Sapit Chairman Gerempung Anak Bulan Mirah Malaysia (PBSM) Miri Dato Sri Lee Kim Shin, penambah tu ketegal kes emejensi enggau musin pengerami.

Ku iya, ba taun 2020 sepital Miri udah ngena 7,001 pain darah enggau 7,151 pain dirikod nyentuk 31 Disember 2021.

Pia mega, ku iya ba taun 2020 suba penyampau pain darah digumpul bisi 7,101 pain lalu penyampau nya terus nambah ba 2021 ngagai 7,371 pain.

Iya madah munyi nya nyerumba Kimpin Meri Darah Gerempung Pemberita Utara Sarawak (NSJA) di PBSM Miri, Hari Minggu.

Kenu ku iya, sepital Miri begunaka 170 nyentuk 190 pain darah ninting minggu lalu sida mesti ngumpul abis nadai 600 ngagai 750 pain sebulan.

Nya alai, lebuh ngelansa pasal kimpin nya , Dato Sri Lee meri puji ngagai NSJA laban udah mujur ngatur aktiviti nya sekumbang pandemik COVID-19 ba Miri.

Tu ngujungka NSJA nerima basa enggau bulih Anugerah Pengatur Program Meri Darah Pemadu Mayuh ba sekumbang PKP di menua tu nyerumba Hari Meri Darah Sedunya Renggat Nasional kena 19 Jun 2021 ari Opis Menteri Pengerai.

Kenyau ari bulan March 2020, NSJA udah mujur ngatur kimpin meri darah ke-5 lalu mujur ngumpul 503 pain darah lalu sehari tu nyadi kimpin meri darah ke-6 diatur NSJA. -EDISI UKAS

add comment