KKM Enda Nulak Gelumbang Varian Omicron Berengkah Ba Malaysia

HARI SATU, 3 JANUARI 2022

KUCHING: Opis Menteri Pengerai Malaysia (KKM) enda nulak dipelaba nyadi gelumbang besai varian omicron deka berengkah ba Malaysia. 

Menteri Pengerai Malaysia Khairy Jamaluddin ba penerang twitter iya madah, ari peragam nya sekeda atur patut lengkas digaga dikena ngelubahka pengerekai varian Omicron ke datai ari Afrika Selatan. 

Entara nya, bungkur dos booster terus dikerembai, ngena sengkabung mua, pejalai angin manah, seruran beperesa pengerai, gaga enggau kuarantin, guna MYSJ Trace nyengkaum nyaga pintu adan entarabansa. Nya sekeda chara dikena nyekat pengerekai Omicron.

Kenu ku iya, atur tu nyengkaum nangguhka pejalai raban umrah berengkah 8 Januari tu. 

Khairy mega madah, atur tumu tu patut digaga dikena nyekat pengerekai varian Omicron ke dipelaba ulih ngeruga sistem pengerai mensia mayuh ngujungka nyadi raya. 

Ku iya, taja data madahka, varian Omicron kurang raya dibanding  Delta tang tetap dikenangi laban mudah berampit, enti majak berampit penyampau orang masuk sepital tauka unit sakit raya mega disadang betambah.

Naka Hari Minggu tu tadi, penyampau varian Omicron ba menua tu bisi  64 kes, lalu 63 kes ari penyampau nya bekaul enggau sida ke pulai ari menua luar enggau siti kes kena rampit dalam menua.-EDISI UKAS

add comment