Pemujur GPS Sejarah Baru Sarawak Kenyau Udah Merdeka

HARI SATU, 3 JANUARI 2022

JEMORENG: Pemujur besai Gabungan Parti Sarawak (GPS) ba PRN12 mandangka rayat nengeri tu nemu semina GPS ulih ngatur nengeri tu enggau manah.

Pia ku Dato’ Murshid Diraja Dr Juanda Jaya, ti madahka mandat ungkup GPS deka ngujungka mayuh agi pemansang diasaika rayat nyengkaum ba sitak DUN Jemoreng dalam timpuh lima taun tu.

Iya ngasaika penyulut GPS ba PRN Ke-12 nyadi sejarah baru pengudah menua merdeka, mandat ke chukup besai nya ngelai pengandal rayat ngagai raban tuai Sarawak enggau pengeransing semua pengari rayat.

Iya madah munyi nya ba Pengerami Makai Selamat Tim Parti Pesaka Bumiputera Bersatu (PBB)/GPS diatur Palan Servis PBB Jemoreng ba Dewan Masyarakat Pergau, Hari Enam.

Pengawa nya bela digulu Tuai Indu PBB Jemoreng, Rokiah Jahar sereta bala tuai pating, indu enggau nembiak dikena ngenang jasa tim parti ke udah mantu nentuka pemujur GPS. 

Nangkan ke nya, kaban tim parti bela meri pengaga ati ngagai Dato’ Dr Juanda ke baru dipadu nyadi Menteri Muda Ba Opis Kepala Menteri (Integriti Enggau Ombudsmen). -EDISI UKAS

add comment