Kabinet Sarawak Ditumbuh Bepelasarka Mayuh Pekara

HARI EMPAT, 6 JANUARI 2021

KUCHING: Pemujur Gabungan Parti Sarawak (GPS) ba Pengawa Bepilih Besai Nengeri (PRN) Ke-12 tu tadi ngelai pengandal engggau tanggungpengawa ke besai dilempai rayat ngagai sida.

Ketegal nya, Kepala Menteri Sarawak, Datuk Patinggi Tan Sri Dr Abang Abdul Rahman Zohari Tun Datuk Abang Openg madah, kabinet nengeri ditumbuh enggau ‘bejimat’ sereta ngira mayuh sukut ngambika semua pelin enggau atur ulih digaga lalu dipenyadi nitihka tuju.

“Ba gaya ekonomi baru, penguji baru, 2030 randaka kitai berundingka jalai kitai mai ubah..Datuk Adenan bekenaka pengelama enam hari numbuhka kabinet lalu aku ngaga kabinet 12 hari ketegal mayuh pekara mesti diperundingka,” pia ku iya madah.

Iya bejaku munyi nya ba pengerami masa sereta beterima kasih ngagai pengereja pengawa PRN Sarawak Ke-12 ba Borneo Convention Centre Kuching (BCCK), kena Hari Tiga.

Ba pengerami ke sebaka, Kepala Menteri ke mega Chairman GPS madah, Gabungan Parti Sarawak deka ngamatka 34 iti semaya baka ba manifesto sida.

Ku iya, tiap bengkah semaya nya mesti dipenyadi dikena mai Sarawak nyadi nengeri mansang manggai taun 2030.

“Nama ke beguna diatu iya nya kitai mesti ngamatka semaya kitai,” ku iya madah baru.

Kelimpah ari nya, Datuk Patinggi Tan Sri Abang Zohari madahka pelin pengawa Perintah Sarawak diatu deka nentuka semua pengawa mai pemaik ngagai genap iku rayat enda ngira umur, bansa enggau jalai pengarap.

Nya alai, ku iya, beberapa iti opis menteri baru ditumbuhka ti bela matih sereta ngembing rebak baru ngambika sida diiri enggau peneleba sereta penemu megai nengeri tu dudi hari ila.

“Ukai reti semua opis menteri tu dipegai aku..laban tu pekara baru alai kitai minta sida ke udah diembing kitai megai penuduk beberapa iti opis menteri.

“Aku enda ba penuduk tu belama laban udah maya iya ila aku deka badu gawa. Kitai mesti ngembing sida ngambi sida ulih gawa dudi hari ila nitihka ubah ekonomi enggau dunya,” ku iya nerang.

Pengerami sehari nya diatur dikena beterima kasih ngagai raban pengereja pengawa parti, penyukung sereta bala gawa ketegal pemanah, saup sida gawa ti mai pemujur ngagai GPS menang ba 76 iti penuduk ari 82 iti ba pengawa bepilih serak tu. -EDISI UKAS

add comment