Pemutus Numbuhka GPS Engkeman, Diterima Rayat

HARI EMPAT, 6 JANUARI 2021

KUCHING: Pemutus empat parti komponen iya nya Parti Pesaka Bumiputera Bersatu (PBB), Parti Rayat Sarawak (PRS), SUPP enggau Parti Demokratik Progresif (PDP) ningkilka diri ari Barisan Nasional (BN) lalu nengkebang Gabungan Parti Sarawak (GPS), siti pemutus ke engkeman.

Presiden Parti Sa’ati Rayat Sarawak (SUPP) Dato Sri Dr Sim Kui Hian madahka pemutus berani ke digaga chairman GPS Datuk Patinggi Tan Sri Dr Abang Abang Abdul Rahman Zohari Tun Datuk Abang Openg nya meri pengelebih ngagai pemesai parti komponen sereta mujur nerima sukung ari rayat Sarawak empu.

Iya madah, sukung nya nyengala dipeda ari pemujur GPS bulih 76 ari 82 iti penuduk ba Pengawa Bepilih Besai Nengeri (PRN) Ke-12 Sarawak.

“Aku deka madah, pengelandik Abang Jo ba taun 2018 suba mai pansut ari BN lalu numbuhka GPS siti pemutus ke landik.

“Tu tau dipeda kitai ari sukung rayat Sarawak ngagai parti menua tu empu (GPS) ba PRN-12 tu tadi.

“Nya alai, terima kasih ngagai Abang Jo ke udah ngaga pemutus nya,” pia ku iya madah.

Iya bejaku munyi nya maya pengawa ngerami raban pengereja pengawa PRN Ke-12 Sarawak ba Borneo Convention Centre Kuching (BCCK), kena Hari Tiga.

Nangkan ke nya, pemangku Presiden PRS Datuk Joseph Salang Gandum ba jaku iya ngenataika jaku terima kasih ngagai kepala menteri ke udah besetuju sereta meri sukung ngagai semua chalun ke dipadu PRS bediri ba pengawa bepilih tu tadi.

Ku iya, PRS udah nyaup nempa pemujur ngagai GPS alai sida menang ba semua 11 iti penuduk Kunsil Nengeri.

“Terima kasih ngagai Kepala Menteri ke udah besetujuka enggau chalun ke dipilih PRS lalu semua sida ke bediri nya bela mujur magang,” ku iya madah.

Kelimpah ari nya, Mandal Presiden PDP, Dato Henry Jinap ti ngarika presiden sida, Dato Sri Tiong King Sing ba jaku iya dekaka semua parti komponen GPS gawa enggau ransing sereta meri servis ke pemadu manah ngagai rayat Sarawak.

“Pengawa bepilih udah tembu. Semua kitai bisi tanggungpengawa ke mesti dikereja lalu aku andal amat semua ulih meri servis ke pemadu manah ngagai rayat,” pia ku iya madah.-EDISI UKAS

add comment