Perintah Sarawak Deka Mayar Dulu Pengawa Ngaga Palan Ngubat Riman Sarawak

HARI EMPAT, 6 JANUARI 2022

KUCHING: Perintah Sarawak deka mansutka belanja dulu dikena ngaga Palan Ngubat Riman Sarawak ke disikap enggau perengkaguna ke chukup.

Sapit Kepala Menteri, Dato Sri Dr Sim Kui Hian madah, pemutus nya udah dikemendarka Kepala Menteri Datuk Patinggi Tan Sri Dr Abang Abdul Rahman Zohari Tun Datuk Abang Openg.

Iya madah, kebendar iya, Perintah Sarawak mansutka dulu belanja dikena ngaga lalu Perintah Besai deka mayar baru ila.

“Enti nunda pengawa ngaga palan nya dibayar nengah Opis Menteri Pengerai Malaysia (KKM), tang Kepala Menteri udah besetuju Perintah Sarawak mansutka belanja dulu ngambika rayat enda lama nganti.

“Rayat kitai udah lama betapi enggau penanggul tu,” pia ku iya madah udah iya ngulu Pengawa Angkat Sumpah Kabinet Perintah Sarawak di DUN kena Hari Dua.

Dato Sri Dr Sim ke mega Menteri Pengerai Mensia Mayuh, Pengawa Berumah enggau Perintah Menua madah, Sarawak enda ulih nganti kelalu lama KKM ngungkupka agih belanja dikena ngaga palan nya alai servis ngubat penyakit riman ba nengeri tu beguna bendar.

“Sarawak bisi belanja ke chukup lalu pengawa tu nadai bepenanggul deka digaga,” ku iya madah baru.

Bulan September 2021, Menteri Pengerai Khairy Jamaluddin madah, KKM udah nganjung peminta ngaga Palan Ngubat Riman Sarawak enggau Unit Pengatur Ekonomi (EPU).

Iya madah, KKM nyukung penemu nya bepun ari servis nya beguna bendar ngagai rayat nengeri Sarawak. -EDISI UKAS

add comment