HARI EMPAT, 6 JANUARI 2022

KUCHING: Perintah Sarawak enggau Petronas deka chakah ngiga chara ke engkeman dikena bejadika atur baka ke udah ditetapka ba Sempekat Dagang (CSA).

Sapit Kepala Menteri, Datuk Amar Awang Tengah Ali Hasan madah, isu bekaul enggau kerejasama ulih dipenyadi lalu bisi mega sekeda isu deka diputarka bekenaka timpuh panjai.

Ku iya, Perintah Sarawak enggau Petronas udah besetuju ngelanggur pelin sereta ngatur program dikena nyungkakka agi pemayuh kompeni ba nengeri tu bela ngambi bagi nengah kontrik ke diberi Petronas.

“Kitai udah besetuju nambahka pemayuh ‘vendor’ Sarawak ba ‘Vendor Development Program’ (VDP).

“Tu deka nentuka industri minyak enggau gis deka meri pemaik ngagai orang dagang, ‘vendor’ lalu muka mayuh agi awak gawa ngagai rayat nengeri tu,” pia ku iya madah.

Dulu ari nya, iya nerima penemuai basa ari Chairman enggau Presiden Petronas, Tan Sri Dato’ Sri Mohd Bakke Salleh enggau Tengku Muhammad Taufik Tengku Kamadjaja Aziz di Wisma Sumber Alam, kena Hari Tiga.

Bekaul enggau pengawa ngelanjar timpuh Production Sharing Contract (PSC), ku Datuk Amar Awang Tengah madah, Perintah Sarawak nengah Petros bekerejasama enggau Petronas ti deka nentuka asil ti manah sereta mai pemaik ngagai semua. -EDISI UKAS