590,290 Ngena S Pay Global, Ngerikod RM1.8 Bilion Transaksyen

HARI LIMA, 7 JANUARI 2022

KUCHING: Aplikasyen eWallet, S Pay Global naka ke diatu udah dikena 590,290 iku mensia mayuh kelimpah 85,445 orang dagang di serata nengeri Sarawak sereta ngerikod penyampau transaksyen manggai RM1.8 bilion.

Direkter Besai Lembaga Multimedia Sarawak (SMA) Dr Zaidi Razak madah, pengawa bekenaka S Pay Global majak nambah kenyau nengeri tu bela betapi enggau pandemik COVID-19.

Ku iya, tu bepun ari sida ke bedagang enggau peranak nengeri tu rindu agi bebayar ngena chara on-line ari ngena mata duit.

“Ukai semina nya, S Pay Global mega udah bekerejasama enggau Bank Simpanan Nasional (BSN) meri servis transaksyen on-line ngagai mensia mayuh ba menua pesisir nengah ejen BSN ke bisi 236 ejen serata nengeri,” pia ku iya nengah penerang media, kena Hari Empat.

Kelimpah ari nya, Dr Zaidi madah, servis S Pay Global dikerembaika ngagai beberapa bengkah pengawa bukai nyengkaum bantu ari Perintah Nengeri.

“Perintah nengeri udah bekenaka servis nya beberika Bantu Khas Sarawakku Sayang (BKSS) ngagai rayat Sarawak maya pandemik COVID-19 tu,” ku iya nerang. -EDISI UKAS

add comment