Perintah Sarawak Chakah Ngemansangka Pengerembai Industri Penyangkai Kapal

HARI DUA, 11 JANUARI 2022

MIRI: Penyangkai Kapal Miri diatu benung betapi enggau penanggul ba operasyen pejalai kapal ketegal nanga Sungai Batang Baram ti pabu.

Chairman penyangkai kapal iya nya, Paulus Palu Gumbang madah, pekara nya balat nekul pengerembai industri ba Kuala Baram.

“Kami ngarapka Perintah Sarawak ulih nyaup mutarka isu ngenalamka agi nanga Sungai Batang Baram.

“Nya alai sebedau tu udah mayuh pengawa diatur nyengkaum ngelanggur deka ngenalamka agi nanga sungai nya ti udah dirintai ba Langgur Pemansang Malaysia Lumpar Ke-8 (RMK-8) nyentuk RMK12,” ku iya madah. 

Iya bejaku munyi nya maya Penemuai Gawa Sekretari Perintah Nengeri Sarawak Datuk Amar Jaul Samion ngagai Penyangkai Kapal Miri, Kuala Baram, kena Hari Satu.

Datuk Amar Jaul maya nya madahka perintah Sarawak chakah nentuka pemujur pemansang industri ba nengeri tu lebih agi udah pandemik COVID-19 nyadi.

Ketegal nya, perintah Sarawak udah numbuhka Pelin Pemansang Udah COVID-19 (PCDS) 2030 dikena ngadu sereta nyungkak sosioekonomi manggai taun 2030.

Ba pekara industri penyangkai kapal, perintah Sarawak  deka nyungkakka kapasiti penyangkai kapal enggau produktiviti ari pekara servis enggau pemansang infrastruktur.

“Tu nyengala ulih dipeda ari pengawa numbuhka siti opis menteri khas dikena nyaga pemansang penyangkai kapal,” ku iya nerang.

Iya mega ngarapka penanggul ketegal nanga Sungai Batang Baram ke pabu ulih diputarka enggau lengkas.

Bela diabas maya nya MPA Crew Change Terminal (MPACCT) Pulau Melayu, Lee Sing Wharf (Piasau), Shin Yang Wharf (Krokop 4), Sim Swee Joo Wharf (Krokop 3) Serimas Logistics Wharf (Krokop 3) enggau Miri Marina Terminal (Coco Cabana, Marina). 

Sama bisi datai Menijar Besai Opis Penyangkai Kapal Sarawak Miri, Serawa Budol.-EDISI UKAS

add comment