HARI DUA, 11 JANUARI 2022
KUCHING: Sarawak udah nyikap diri napi penusah ampuh bah ketegal musim ujan nuntung nengeri tu.
Sapit Kepala Menteri, Datuk Amar Douglas Uggah Embas ke mega Chairman Komiti Penyangga Penusah Nengeri (JPBN) Sarawak madah, Perintah Sarawak besaup enggau Perintah Besai nyikap ejensi ke bekaul kenyau ari bulan November 2021.
“Bisi lapan iti opis ti dikeringka 6,705 iku raban deka ngemujurka pengawa tu.
“Kitai mega bisi 286 buah perau, 115 lori, 247 buah 4×4, tiga buah helikopter enggau tiga buah perengka pengangkut amfibia,” pia ku iya madah ba aum media udah Aum JPBN Sarawak ba Wisma Bapa Malaysia di Kuching kena Hari Dua.
Datuk Amar Douglas mega madah, bisi 621 palan ngenduh (PPS) ke tau alai 185,067 iku mensia mayuh enggau palan nyimpan barang ke dikena orang tasah bela udah disediaka alai pemadu besai di Samarahan kelimpah palan ke sebaka di Kuching, Samarahan enggau Kuching.
Awak nya mega dikena iya nangkan mensia mayuh lebih agi sida ke diau ba endur ke tau ampuh bah semampai betatika pengelikun diri sereta nitihka tangkan opis bekaul nyema sida dipinta mindah. -EDISI UKAS
