SMK Balai Ringin Nadai Nanggul Muka Sekula Taja Empai Lama Napi Penusah Angus

HARI DUA, 11 JANUARI 2022

SERIAN: Pengeransing Sekula Sekondri (SMK) Balai Ringin muka sekula sida taja empai lama udah dituntung penusah angus.

Menteri Pelajar, Inovasyen enggau Pemansang Pengelandik Sarawak, Datuk Roland Sagah Wee Inn madah, iya berasai temegah ati enggau ulah ti dikemeranka bala pengajar dia nentuka sekula sida ulih dibuka baka selama.

Ku iya, bomba udah dipinta ngelengkaska agi pengawa mansik penusah angus ke nyadi kena Hari Enam tu tadi ngambika pengawa ngaduka opis ke udah angus nya ti nyengkaum bilik pengajar ulih dirumban.

Nambahka nya, iya madahka opis menteri iya semampai besedia beberika bantu baka perengka guna ke patut ngagai sekula nya.

“Kami deka chakah beberika bantu laban aku nemu raban sekula begunaka mayuh agi perengka guna ke bukai kelimpah begunan opis nya.

“Nya alai enda salah raban sekula merambu sereta minta bantu ari opis menteri ke pemaik bala nembiak sekula,” ku iya madah munyi nya maya nemuai ngagai SMK Balai Ringin, kena Hari Satu.

Prinsipal sekula nya, Zakaria Dolmat madahka bala pengajar naka ke diatu digagaka endur gawa ba balai mensia mayuh sekula sida.

Sama bisi datai Menteri Muda Pelajar, Inovasyen enggau Pemansang Pengelandik Sarawak, Dr. Annuar Rapa’ee, Menteri Muda Dagang Temuai, Industri Kreatif Enggau Seni Pemerindang ke mega Kaban Kunsil Nengeri (ADUN) Balai Ringin, Datuk Snowdan Lawan, Sekretari Mendam Opis Menteri Pelajar, Datu Kameri Affandi, Chairman Sapit Direktor, Sektor Infrastruktur Enggau Perolehan JPNS, Wan Fadilah Wan Ahmad, Pegawai Pelilih Serian, Chali Ungang, Residen Sitak Serian, Tuah Suni enggau Tuai Opis Bomba Serian, James Gani. -EDISI UKAS

add comment