Dato Sri Fatimah Chakah Nandu Pengeransing Nyungkakka Pemansang, Ekonomi Enggau Pelajar Di DUN Dalat

HARI EMPAT, 13 JANUARI 2022

DALAT: Menteri Raban Indu, Pemansang Nembiak Mit Enggau Pengelantang Mensia Mayuh, Dato Sri Fatimah Abdullah madahka diri deka nandu pengeransing iya majakka program pemansang, ngemanahka ekonomi sereta nyungkakka tikas pelajar ba sitak Kunsil Nengeri (DUN) N.56 Dalat.

Iya ke mega Kaban Kunsil Nengeri (ADUN) Dalat ngenataika jaku terima kasih ngagai bala pengundi enggau komiti pati parti Pesaka Bumiputera Bersatu (PBB) ba DUN nya ti udah sekali agi meri sukung ngagai iya ba Pengawa Bepilih Besai Nengeri (PRN) Sarawak Ke-12 tu tadi.

Iya bejaku munyi nya maya datai ngulu pengerami selamat begulai enggau komiti PBB Kampung Sungai Ud Dalat di Dalat, kena Hari Tiga.

Ba pengerami nya, Dato Sri Fatimah bisi nyuaka chek Projek Mit Menua Pesisir (MRP) ngagai Komiti Pemansang enggau Pengelikun Genturung Pendiau (JKKK), gerempung ukai dikuasa perintah (NGO) enggau raban ‘volunteer’ dikena ngaga jalai semin, ‘rumah belanga’ (endur ngaga sagu), ngemanahka gelanggang futsal enggau ngaduka rumah rayat dia. -EDISI UKAS

add comment