Sarawak Ngerikod Tikas Ulih Berampit, Penyampau Kes Nabanka Nyawa Ketegal COVID-19 Pemadu Baruh

HARI LIMA, 14 JANUARI 2022

KUCHING: Sarawak ngerikod tikas ulih berampit (RO) enggau penyampau kes pemati ketegal COVID-19 pemadu baruh di Malaysia.

Sapit Kepala Menteri, Dato Sri Dr Sim Kui Hian madah, taja pia rayat ditu patut ngetanka ulah semampai nyaga pengelikun diri ngambika penyakit nya enda majak nyadi sereta berampit.

“Terima kasih mayuh ngagai rayat Sarawak ke udah besaup ngelaban pengelekai COVID-19 tu.

“Ketegal kerejasama kita tikas penyampau kes nabanka nyawa di Sarawak pemadu baruh enti dibanding enggau nengeri bukai kelimpah Labuan enggau Putrajaya.

“Kelimpah ari nya, penyampau RO COVID-19 ba Sarawak mega pemadu baruh ba menua tu,” pia ku iya madah.

Iya bejaku munyi nya nengah penerang ke dibantai iya ba Facebook kena Hari Tiga tu tadi udah ke ngulu aum on-line begulai enggau Chairman Komiti Penyangga Penusah Nengeri (JPBN) Sarawak ke mega Sapit Kepala Menteri, Datuk Amar Douglas Uggah Embas.

Nambahka jaku iya, Dato Sri Dr Sim ke mega Menteri Pengerai Mensia Mayuh, Pengawa Berumah enggau Kaunsil Kandang Menua Sarawak madah, penyampau rayat ke udah nerima vaksin COVID-19 ba Sarawak mega pemadu mayuh di menua tu.

“Bisi 91.7 peratus orang besai tuai udah nerima dos 1 enggau dos 2 lalu 87.9 peratus raban nembiak bela udah betuchuk vaksin naka ke diatu.

“Kelimpah ari nya, ba bulan Oktober 2021 nyentuk Januari 2022, bisi 1,814,752 orang besai tuai di Sarawak tau betuchuk dos ‘booster’ tang semina 74.2 peratus aja datai lalu 468,904 empai betuchuk dos nya.

“Semina 59.3 peratus ari sida ke beumur 18 ngagai 29 taun nerima dos ‘booster’ sida,” ku iya nerang. -EDISI UKAS

add comment