HARI MINGGU, 16 JANUARI 2022

BAU: Bisi 16 Ketuai Bilik (KIR) ke tasah ketegal ribut kudi di Kampung Opar nerima Bantu Duit Ihsan enggau ngemanahka rumah nengah Projek Ngemanahka Rumah Seranta Sarawak (PPRMS).

ADUN Opar Billy Sujang udah datai nyuaka bantu nya sepengudah ngabas rumah sida ke tasah ketegal ribut Monsun Timur Laut ti nyadi kena 4 Januari tu tadi ba Kampung Opar begulai enggau Komiti Penyangga Penusah Pelilih Bau (JBDB) kena Hari Enam.

Billy Sujang madah, bantu ke diberi beungkus RM164,050 ari JBDB iya nya Bantu Duit Ihsan ari Ejensi Pengatur Penusah Menua (NADMA) enggau penyampau RM1,000 ngagai sida ke tasah.

Pia mega, bantu belanja ngemanahka rumah ti jai ketegal Monsun Timur Laut beungkus RM148,050 diberi ari Komiti Penyangga Penusah Nengeri (JPBN) Sarawak.

Kelimpah ari nya, Palan Servis Dun Opar mega meri belanja sepenyampau RM141,000 nengah PPRMS lalu ngarapka kereja enggau pengawa ngemanahka rumah nitih standard (B-Q) Opis Kereja Raya (JKR) ulih diputarka enggau lengkas.-EDISI UKAS