HARI SATU, 17 JANUARI 2022

SRI AMAN: Kaban Kunsil Nengeri (ADUN) Bukit Begunan, Datuk Mong Dagang ransing deka ngamatka peminta rayat baka ke udah disemaya iya ngagai peranak menua nya.

Datuk Mong ba jaku iya maya Program Nasih Tanah Rumah Tina Majeng, Melugu Tembawai Papan kena Hari Minggu tu tadi madah, pengeransing iya randaka saup ari Tuai Raban Bansa enggau Genturung Pendiau (KMKK) ngemujurka pemansang rayat.

Kelimpah ari nya, ba pengerami nya, Datuk Mong ngungkupka RM190,000 belanja ari Projek Transformasyen Menua Pesisir (RTP) dikena ngaga baru Rumah Tina Majeng, RM5,000 Projek Mit Menua Pesisir (MRP) ungkup Biro Indu enggau belanja RM50,000 ke diberi nengah RTP dikena ngaga palan muai uras ba kandang Melugu Skim.

Maya nya, iya mega bisi nyuaka chek MRP enggau penyampau RM8,000 ngagai Komiti Pemansang Enggau Pengelikun Genturung Pendiau (JKKK) Melugu Tembawai Papan. -EDISI UKAS