HARI SATU, 17 JANUARI 2022

LAWAS: Pemujur Gabungan Parti Sarawak (GPS) ba Pengawa Bepilih Besai Nengeri Ke-12 Sarawak tu tadi ngemuntangka agi pengawa nandu program pemansang ba sitak Kunsil Nengeri (DUN) Bukit Sari.

Sapit Kepala Menteri Datuk Amar Awang Tengah Ali Hasan madah, pemansang tu nyengkaum pemansang sekula, jalai alun, api, ai, arus penyambung sereta ke bukai lalu deka disungkakka agi.

“Ari sukung rayat tu Perintah Sarawak nadai nanggul majakka pemansang ba menua kitai ditu.

“Bisi nya udah digaga lalu bisi mega benung digaga kelimpah bisi benung diperambu.

“Kitai deka majakka program pemansang nengah sukung rayat tu nyengkaum nyungkakka tikas pengidup enggau pengelantang rayat nyerumba juluk ati deka nempa Sarawak nyadi nengeri mansang,” pia ku iya madah.

Iya bejaku munyi nya ba pengerami selamat beserimbai enggau pemujur GPS Zon Kuala Lawas enggau pengawa nyuaka pemeri beg sekula ngagai Sekula Primeri (SK) Kuala Lawas di dewan Kampung Noor Islam Kuala Lawas, kena Hari Minggu.

Datuk Amar Awang Tengah ke mega Kaban Kunsil Nengeri (ADUN) Bukit Sari ngena awak nya ngelalau bala apai indai ngambi nentuka anak sida bulih pelajar ke patut ketegal ngira pengidup dudi hari.

“Kitai mesti nentuka anak kitai bisi pelajar enggau pengelandik nambahka diatu dunya nyau berubah, bekenaka teknologi moden.

“Tu deka nentuka pemujur pengidup anak kitai dudi hari ila,” ku iya madah baru.

Ba pengerami nya iya nyuaka pemeri beg sekula ngagai 26 iku nembiak SK Kuala Lawas.

Sama bela datai, Sapit Menteri Perengka Pengangkut Malaysia ke mega Kaban Parlimen Lawas Dato’ Henry Sum Agong. -EDISI UKAS