Projek Ngaga Baru Jematan Sungai Satap 1 Dikeandal Tembu Nitih Maya Diletak

HARI SATU, 17 JANUARI 2022

LAMBIR: Menteri Muda Raban Nembiak, Lumba enggau Pemansang Dagang Dr Ripin Lamat minta projek ngaga baru Jematan Sungai Satap 1 digaga nitihka timpuh ke udah diletak.

Iya ke mega Kaban Kunsil Nengeri (ADUN) Lambir madah, naka ke diatu projek nya benung digaga.

“Aku ngarapka projek ngaga baru jematan tu ulih digaga nitihka timpuh projek ti udah ditetapka.

“Penembu jematan tu ila deka mai pemaik enggau pengelantang ngagai peranak rumah panjai ditu,” pia ku iya madah nengah penerang ba laman Facebook iya, kena Hari Enam tu tadi.

Dulu ari nya iya bisi datai ngabas taba projek nya ti bekenaka ungkus RM500,000.

Jematan Sungai Satap 1 tu ditengah peranak Rumah Awain Seloi enggau Rumah Mokeng kelimpah ngelawa Sekula Primari (SK) Ulu Satap. -EDISI UKAS

add comment