Projek Ngemanahka ‘Traffic Light’ Di Samarahan Benung Digaga

HARI SATU, 17 JANUARI 2022

KUCHING: Projek ngaga ‘Smart Traffic Light’ di Kota Samarahan deka nyaup mutarka penusah jalai sekut ke diatu benung digaga.

Menteri Perengka Pengangkut Sarawak, Dato’ Sri Lee Kim Shin madah, ‘traffic light’ nya bekenaka teknologi baru, ‘Artificial Intelligence’ .

“Smart Traffic Light tu ngena teknologi ‘Artificial Intelligence’ dikena ngatur sereta nyaga pengelikun jalai alun. Ngambika chunto, maya jalai benung dedat tauka sekut, dia alai sistem tu deka meri awak muka jalai ke sekut nya,” ku iya.

Iya bejaku munyi nya maya berandau enggau media udah bejadika Kimpin Pengelikun Jalai Alun di Kuching, kena Hari Satu.

Projek nya digaga ba roundabout Setia Raja-Samarahan Stutong-Samarahan, simpang ILP/LKIM, Pusat Jantung Sarawak-Samarahan enggau Universiti Malaysia Sarawak (UNIMAS)-Samarahan.

Kelimpah ari nya, iya mega madah, projek ke sebaka deka digaga ba semua ‘traffic light’ serata nengeri tu.

Ba pekara bukai, Dato’ Sri Lee madahka opis menteri iya deka ngatur program ‘Awareness Behaviour Change’ enda lama agi dikena mai mensia mayuh bela ngemeranka ulah nitihka atur jalai alun.-EDISI UKAS

add comment