Raban Nembiak GPS Besemaya Deka Gawa Enggau Manah

HARI SATU, 17 JANUARI 2022

MUKAH: Raban Nembiak Gabungan Parti Sarawak (GPS) besemaya deka majakka pengawa meri servis ke pemadu manah ba tuju besaup nempa Sarawak nyadi nengeri mansang.

Menteri Raban Nembiak, Lumba enggau Pemansang Dagang I, Dato Gerald Rentap Jabu madah, tanggungpengawa raban nya beguna bendar ngagai pemujur dudi hari ila nengeri tu.

“Diatu kitai dipinta nyungkakka pemansang ke lebih agi baikka ba ‘polisi’ digital, ekonomi digital, jalai nebing sungai nyengkaum Penyangkai Bilun Mukah kelimpah pengawa tetemuka gis di Balingian.

“Raban nembiak enggau rebak baru patut beambi ulih ari pekara tu dikena ngangkatka agi ekonomi kitai lalu pia mega mensia mayuh ke bukai,” pia ku iya madah maya Majlis Santai Belia beserimbai enggau penemuai iya ke Mukah, empai lama tu tadi.

Dato Gerald ke mega Kaban Kunsil Nengeri (ADUN) Layar bela meri jaku terima kasih ngagai Kepala Menteri Datuk Patinggi Tan Sri (Dr) Abang Abdul Rahman Zohari Tun Datuk Abang Openg ti ngandalka Raban Nembiak nyaup majakka pegai Perintah Sarawak.

Dulu ari nya, ADUN Tellian, Royston Valentine ba jaku iya madahka pengawa numbuhka siti pati raban nembiak ba Parti Pesaka Bumiputera Bersatu (PBB) kelai ti tampak madahka Kepala Menteri dekaka raban nembiak bela ngambi bagi ba pejalai politik di Sarawak.

Kelimpah ari nya, Dato Gerald enggau Royston bisi bejalai betemu enggau rayat ba Makit Mukah, kena Hari Enam tu tadi.

Seduai ngena awak nya berandau enggau mensia mayuh dia kelimpah bala ke bejual ba makit nya.

Penemuai Dato Gerald ditandu enggau pengawa ngabas palan ampuh bah di Tellian Ulu lalu ditangkan enggau pengawa ngulu Pekit Tenis Mukah 2022.

Iya mega bisi nemuai ngagai Stadium Mukah alai maya nya Royston minta perengka guna lumba nyemerai enggau futsal ulih ditambah ba Renggat 2 ba Stadium nya. -EDISI UKAS

add comment