Enam NGO Nerima Geran Khas Kepala Menteri

HARI DUA, 18 JANUARI 2022

LIMBANG: Sapit Kepala Menteri, Datuk Amar Awang Tengah Ali Hasan nyuaka geran khas Kepala Menteri Sarawak ngagai enam gerempung ukai dikuasa perintah (NGO) enggau ejensi perintah di Pelilih Limbang, kena hari minggu tu tadi.

Iya madah, geran enggau penyampau RM77,000 nya enti nunda disuaka taun siti tadi tang tejanggal ketegal Pengawa Bepilih Besai Nengeri (PRN) Sarawak Ke-12.

“Aku ngarapka pemeri tu ulih dikena enggau manah sereta mai pemaik ngagai gerempung.

“Sebedau tu mega, geran ke sebaka udah dibagi ngagai gerempung ba pelilih bukai sebedau sehari tu (Hari Minggu) gintir pelilih Limbang nerima pemeri nya,” ku iya madah.

Bejaku maya pengawa nya ke diatur di Limbang, iya madah, geran tambah nya diberi Kepala Menteri Datuk Patinggi Tan Sri (Dr) Abang Abdul Rahman Zohari Tun Abang Openg ketegal peminta rayat majak nambah.

Datuk Amar Awang Tengah mega ngarapka geran nya tau bendar nyaup penerima ngemujurka agi program sida.

Sama bela datai Sapit Menteri Pemansang Menua Pesisir II ke mega Kaban Parlimen Limbang Datuk Hasbi Habibollah, Menteri Muda Pengawa Betanam Betupi Moden enggau Pemansang Kandang Menua ti mega Kaban Kunsil Nengeri (ADUN) Bukit Kota Datuk Dr Abdul Rahman Ismail enggau ADUN Batu Danau Paulus Palu Gumbang -EDISI UKAS

add comment